Türkmenistanyň animasiýa sungatynda we çagalar üçin niýetlenen multimediýa ulgamynda uly ylmy-döredijilikli ädim ädilýär. Awgust aýynyň ortalarynda paýtagtymyzyň Söwda-senagat edarasynyň Sergiler zalynda geçiriljek «Kids Expo» halkara sergi-ýarmarkasynyň çäklerinde «Menekliler» diýlip atlandyrylan täze çagalar 3D-multserialynyň ilkinji tanyşdyrylyş dabarasy bolar. Bu Taslama ýurdumyzyň animasion önümçiligini täze basgançaga çykarmak maksady bilen amala aşyryldy.

Ylmy-terbiýeçilik we köpçülikleýin ähmiýete eýe bolan bu täze animasion taslama «MenzilMekan Animation» studiýasy tarapyndan taýýarlanyp, Ol «Nowça TV» multimediýa platformasy arkaly tomaşaçylara ýetiriler. Multserialyň süňňünde ýaş nesli adamkärçilik, dogruçyllyk, daş-töwerege hormat goýmak we özara kömekleşmek ýaly milli hem-de umumyadamy gymmatlyklaryň ruhunda terbiýelemek iddeýasy ýatyr. Gyzykly süjetler arkaly çagalaryň dünýägaraşyny giňeltmek göz öňünde tutulýar.

Multserialyň esasy aýratynlyklarynyň biri hökmünde görkezilýän gahrymanlaryň çagalar bilen bilelikde ösüp-ulalmagy we olaryň gündelik durmuşynda duş gelýän meselelere bilelikde jogap gözlemegi bolup durýar. Ýaş tomaşaçylar her bir täze bölüm arkaly öz söýgüli gahrymanlarynyň başdan geçirmelerine ortak bolup, daşky dünýäni öwrenmäge we möhüm durmuşy sapaklary almaga mümkinçilik alarlar. Bu bolsa taslamanyň diňe bir göwün açar däl, eýsem Pedagogik taýdan hem uly ähmiýete eýedigini görkezýär.

Halkara sergä geljek myhmanlar we ýaş tomaşaçylar «Menekliler» multserialynyň ilkinji seriýalary bilen ýakyndan tanşyp, milli 3D-animasiýasynyň täze tapgyryna şaýat bolup bilerler. Awgust aýynyň 19—22-si aralygynda geçiriljek bu giň gerimli sergi-ýarmarka çagalar dünýäsine degişli köp sanly täzelikleri we innowasion taslamalary bir ýere jemlär.