2026-njy ýylyň ýanwar – iýul aýlarynyň dowamynda türkmen türgenleri halkara bäsleşiklerinde ýokary netijeleri görkezip, jemi 471 medal gazandylar. Bu barada 1-nji awgustda sanly ulgam arkaly geçirilen Hökümet mejlisiniň dowamynda wise-premýer B.Mämmedow hasabat berdi.

«Türkmenistanyň Döwlet habarlar agentliginiň» (TDH) habar berşi ýaly, hasabat döwründe bilim we ylym ulgamlaryny döwrebaplaşdyrmak işleri yzygiderli dowam etdirildi. Ýaşlar halkara bilim bäsleşiklerinde uly üstünlikleri gazandylar. Tomusky dynç alyş möwsüminde Gökderedäki, welaýatlardaky we Awazadaky merkezlerde çagalaryň talapalaýyk dynç alşy üpjün edildi. Mundan başga-da, Ylymlar akademiýasynyň Halkara ylmy-tehnologiýa parkynda «Sanly ylym» atly ÝUNESKO kafedrasy döredildi.

Saglygy goraýyş ulgamynda öňüni alyş-bejeriş işleriniň öňdebaryjy usullary amaly lukmançylyga ornaşdyryldy. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna näsag çagalara operasiýalar we bejergiler geçirildi. Ýurduň döwrebap şypahanalarynda ilata we daşary ýurt raýatlaryna ýöriteleşdirilen sagaldyş hyzmatlary ýerine ýetirildi.

Hormatly Prezidentimiz Serdar Berdimuhamedow hasabaty diňläp, bilim bermegiň hilini has-da ýokarlandyrmagyň, saglygy goraýyş ulgamyny kämilleşdirmegiň hem-de ylym ulgamynda netijeli özgertmeleri durmuşa geçirmegiň wajypdygyny nygtady. Döwlet Baştutanymyz wise-premýere köpçülikleýin bedenterbiýäni we sporty ösdürmäge aýratyn üns bermegi tabşyrdy.