OpenAI kompaniýasynyň ýolbaşçysy Sem Altman emeli aň tehnologiýalaryndan peýdalanmak üçin töleg usulyny düýpli üýtgetmegi teklip etdi. Waşingtonda geçirilen «BlackRock Infrastructure Summit» sammitinde çykyş eden Altman, emeli aňyň geljekde edil suw ýa-da elektrik energiýasy ýaly jemagat-hojalyk hyzmatlarynyň nusgasynda elýeterli bolmalydygyny belledi. Bu täze modele görä, ulanyjylar aýlyk durnukly abuna töleginiň deregine, diňe hakyky ulanan hyzmatynyň mukdaryna görä töleg ederler.

Bu teklibiň orta atylmagyna emeli aň kompaniýalarynyň, aýratyn-da OpenAI-yň çykdajylarynyň örän ýokarydygy we maliýe durnuklylygyny saklamagyň kynlygy sebäp boldy. Ýakynda çap edilen hasabatlara görä, OpenAI 2026-njy ýylda takmynan 14 milliard dollar zyýan çekip biler. Kompaniýanyň düzümindäki infrastruktura, ylmy barlaglar we ýokary hünärli işgärler üçin edilýän çykdajylar örän uly bolup, 1,4 milliard dollara ýetýär, bu bolsa 2027-nji ýylyň ortalaryna çenli maliýe çökgünligi töwekgelçiligini döredýär.

Häzirki wagtda ChatGPT ulgamy ýyllyk 13 milliard dollar töweregi girdeji getirýär, emma hasaplaýyş kuwwatynyň we ýokary hilli maglumatlaryň ýetmezçiligi uly mesele bolup galýar. Kompaniýa şu günki günde tölegli abunalar we käbir ýurtlarda mahabatly mugt görnüşleri ulanýar. Ulanan mukdaryňa görä töleg etmek ulgamyna geçilmegi, kompaniýanyň serişdelerini has netijeli paýlamaga we maliýe ýitgilerini azaltmaga kömek edip biler.

Altman emeli aňa bolan islegiň dünýä derejesinde örän çalt artýandygyny, munuň bolsa hasaplaýyş serişdelerine bolan basyşy güýçlendirýändigini nygtady. Täze töleg modeli emeli aňy seýrek ulanýan şahsy ulanyjylar üçin has amatly bolup biler, ýöne bu tehnologiýany öz işinde yzygiderli we giňden ulanýan kärhanalar üçin çykdajylaryň artmagyna eltip biler. Şeýle-de bolsa, bu ädim emeli aňyň geljekde ählumumy elýeterli sanly resursa öwrülmegi ugrundaky möhüm öwrülişikdir.