Russiýa Federasiýasynyň Prezidenti Wladimir Putin Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowa doglan güni mynasybetli ýörite gutlag hatyny ýollady. Bu barada ýurdumyzyň resmi metbugaty bolan «Türkmenistan» gazetinde habar berildi. Russiýanyň Baştutany öz hatynda Gahryman Arkadagymyzyň taryhy döwletlilik işine we iki ýurduň arasyndaky gatnaşyklary berkitmekdäki uly hyzmatlaryna belent baha berdi.

Wladimir Putin öz hatynda Milli Lideriň köpýyllyk netijeli döwlet işiniň Türkmenistanyň raýatlarynyň arasynda çuňňur hormata hem-de dünýä giňişliginde uly abraýa eýe bolmagyna şert döredendigini aýratyn belledi. Russiýa tarapynyň iki döwletiň arasyndaky özara bähbitli we birek-birege ynanyşmak esasyndaky gatnaşyklary ösdürmek ugrunda Gahryman Arkadagymyzyň edýän tagallalaryna ýokary baha berýändigi gutlagda aýratyn nygtaldy.

Russiýanyň Prezidenti ikitaraplaýyn gatnaşyklaryň geljegine uly ynam bildirip, Russiýa bilen Türkmenistanyň dostlukly halklarynyň bähbidine hem-de sebit durnuklylygyny goramak maksady bilen, gatnaşyklaryň mundan beýläк-de ösdüriljekdigini mälim etdi. Hatda strategik hyzmatdaşlyk ruhundaky gatnaşyklaryň çuňlaşdyrylmagynyň Merkezi Aziýa we Hazar deňzi sebitlerinde howpsuzlygy üpjün etmekde möhüm orun eýeleýändigi bellenildi. Wladimir Putin hatynyň ahyrynda Hormatly Gurbanguly Mälikgulyýewiçe berk jan saglyk, maşgala rowaçlygy we täze üstünlikleri arzuw etdi.