London Kings kollejiniň professory Lýusi Manronyň geçiren ylmy barlaglary netijesinde dünýä belli dramaturg Wilýam Şekspiriň Londonda ýaşan öýüniň takyk salgysy tapyldy. XVII asyra degişli täze tapylan kartalar we arhiw resminamalary ýazyjynyň 1613-nji ýylda satyn alan mülküniň serhetlerini anyklamaga ýardam etdi.

Ozal bu binanyň Blekfraýars etrabynda ýerleşendigi çak edilse-de, onuň anyk ýeri nämälimligine galýardy. Täze maglumatlar bu taryhy künjegiň häzirki Aýrlend-Ýard we Bergon-strit köçeleriniň çäginde ýerleşendigini görkezýär. Şeýle hem, Sent-Endrýus-Hill köçesindäki ýadygärlik tagtasynyň hut dramaturgyň öýüniň binýadynda oturdylandygy mälim boldy.

Şekspiriň bu öýüniň Blekfraýars teatrynyň golaýynda bolmagy onuň ömrüniň soňky ýyllarynda Londonda has köp wagt geçirendigine şaýatlyk edýär. Alymlaryň pikirine görä, ol «Genrih VIII» ýaly soňky meşhur eserleriniň üstünde hut şu ýerde işlän bolmagy mümkindir.

Dramaturgyň Stratfordda maşgala ojagy bolan hem bolsa, Londondaky bu mülki onuň döredijilik işi üçin strategik ähmiýete eýe bolupdyr. Bu açyş iňlis edebiýatynyň nusgawy wekiliniň durmuş ýoly we 1616-njy ýyldaky ölümi bilen bagly taryhy maglumatlary täzeçe öwrenmäge ýol açýar.