Gruziýanyň paýtagty Tbilisi şäherinde döwlet saparynda bolýan Türkmenistanyň Prezidenti Serdar Berdimuhamedow bilen Gruziýanyň Premýer-ministri Irakliý Kobahidzeniň arasynda ýokary derejeli gepleşikler geçirildi. «Watan» habarlar gepleşiginiň maglumatlaryna görä, duşuşygyň dowamynda döwlet Baştutanymyz Gruziýanyň Hükümet ýolbaşçysyny özi üçin amatly bolan islendik wagtda Türkmenistana resmi sapar bilen gelmäge çagyrdy.

Prezident Serdar Berdimuhamedow görkezilen ýokary myhmansöýerlik we mähirli kabul edişlik üçin minnetdarlyk bildirip, iki ýurduň arasyndaky dostluk we özara ynanyşmak gatnaşyklarynyň mundan beýläk-de rowaçlanjakdygyna ynam bildirdi.

Gruziýanyň Premýer-ministri Irakliý Kobahidze çakylyk üçin tüýs ýürekden hoşallyk bildirdi we Türkmenistanyň Prezidentiniň bu saparynyň Gruziýada geçirilýän Türkmenistanyň Medeniýet günlerine gabat gelmeginiň aýratyn ähmiýete eýedigini aýtdy. Hükümet ýolbaşçysy medeni-ynsanperwer ugurdaky hyzmatdaşlygy has-da ösdürmäge taýýardygyny tassyklap, resmi çakylygy memnunlyk bilen kabul etdi.