Ermenistan Respublikasynyň Prezidenti Waagn Haçaturýan, Ararat welaýatynyň Argawend obasynda ýerleşýän XV asyra degişli Garagoýunly türkmen hanylarynyň kümmetine baryp gördü. Bu barada Türkmenistanyň Ermenistandaky ilçihanasynyň metbugat gullugy habar berdi.

Çärä Ermenistanyň bilim, ylym, medeniýet we sport ministri Žanna Andreasyan, Prezident diwanyň işgärleri, Türkmenistanyň Ermenistandaky ilçisi Muhammetgeldi Aýazow we diplomatik wekilhananyň işgärleri gatnaşdylar.

Prezidente kümmediň taryhy ähmiýeti, arhitektura aýratynlyklary hem-de geçirilen abatlaýyş işleriniň tapgyrlary barada maglumat berildi.

Ilçi Aýazow türkmen-ermeni gatnaşyklarynyň möhüm ugry hökmünde medeni-ynsanperwer hyzmatdaşlygyň möhüm orny tutýandygyny belledi.

Şeýle hem, awgust aýynyň başynda iş sapary bilen Türkmenistana eden saparynyň çäginde, Prezident Haçaturýan Türkmenbaşy şäherindäki ermeni ybadathanasyna baryp gördi. 1905-nji ýylda bagyşlanan bu ybadathana sowet döwründe zeper ýetirilen bolsa-da, soňky ýyllarda türkmen tarapynyň ony gorap saklamaga we abadanlaşdyrmaga gönükdirilen tagallalary dowam edýär. Şeýle hem, türkmen häkimiýetleri bu ybadathananyň doly täzeden dikeldilmegine taýýardyklaryny mälim etdiler.