Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň baştutanlygynda geçirilen Ýaşulular geňeşiniň nobatdaky mejlisinde milli ýörelgelerimize we ynsanperwerlik pelsepämize laýyk gelýän täsin hem-de taryhy waka boldy. Mejlisiň barşynda Türkmenistanyň Halk Maslahatynyň Diwanynyň iş dolandyryjysy R.Bazarow Gahryman Arkadaga ýakynda dünýä inip, hossarsyz galan we Aşgabat şäheriniň çagalar öýünde döwlet tarapyndan terbiýelenip başlanan gyzjagaza mynasyp at dakmak baradaky haýyş we teklip bilen ýüzlendi.

«Watan» habarlar gepleşiginde bellenilişi ýaly, Milli Liderimiziň ýurdumyzyň ýaş nesillerine, aýratyn-da howandarlyga mätäç çagalara berýän hemişelik atalyk söýgisi, olaryň saglygy we gelejegi bilen yzygiderli gyzyklanmagy çagalarda kalbynda uly guwanç duýgusyny oýarýar. Çagalary goramagyň halkara gününiň öňsyrasynda guralan bu geňeşde şeýle asylly meseläniň seredilmegi türkmen jemgyýetiniň çagalara we maşgala mukaddesligine goýýan sarpasynyň aýdyň nyşany boldy.

Türkmen halkynyň Milli Lideri Ýaşulular geňeşiniň agzalarynyň teklibini doly goldady we bu çaganyň aýlaryň seresi bolan mukaddes Gurban aýynda doglandygyny nazara alyp, oňa Arkadag gyzy Gurbangül diýip at dakmagy maslahat berdi. Munuň özi mukaddes we sahawatly senelere bolan milli hormatyň aýdyň subutnamasydyr. Gahryman Arkadagymyz bu pursatda has dabaraly we pelsepewi sözleri aýdyp, asylly türkmen gümrahynda hossarsyz-howandarsyz çaganyň ýokdugyny, olaryň arkasynda dag ýaly bolup, berkarar we kuwwatly döwletiň durandygyny aýratyn belledi.