Dünýäniň iň iri striming platformasy bolan Netflix meksikaly meşhur suratkeş zenan Frida Kalo we onuň adamsy, belli nakgaş Diego Riweranyň durmuşyna bagyşlanan täze serialyň üstünde işläp başlady. «Deadline» neşiriniň habar bermegine görä, bu taslama ýazyjy Kler Berestiň «Gara reňk ýok, bolmazam» (Rien n'est noir) atly meşhur romanyna esaslanar. Serial meşhur jübitiniň diňe bir döredijilik ýoluny däl, eýsem olaryň şahsy durmuşynyň iň gizlin taraplaryny hem açyp görkezer.

Serialda iki suratkeşiň arasyndaky örän çylşyrymly we galagoply gatnaşyklar — çuňňur söýgi, biwepalyk we döredijilik bäsdeşligi şol döwrüň syýasy hem-de jemgyýetçilik ýagdaýlary bilen utgaşykly beýan ediler. Ssenariýany Mariýa Rene Prudensio ýazýar, režissýorlyk işine bolsa «Jek Raýan» serialy bilen tanalýan Patrisia Riggen hem-de «Narko» (Narcos) taslamasynyň üstünde işlän Gabriel Ripstaýn jogap berer. Filmiň resmi ady häzirlikçe mälim edilmedi, emma oňa häzirden uly gyzyklanma bildirilýär.

1907-nji ýylda dünýä inen Frida Kalo Meksikanyň iň tanalýan sungat wekilleriniň biridir. Onuň eserlerinde realizm, simwolizm we Meksikanyň halky sungatynyň elementleri täsin görnüşde jemlenýär. Fridanyň ykbaly 18 ýaşynda uçran agyr ulag heläkçiliginden soň düýpli üýtgeýär. Oňurgasy, ýanbaş süňkleri we gapyrgalary birnäçe ýerinden döwlen ýaş gyz uzak wagtlap düşege baglanýar we ömrüniň ahyryna çenli agyrylaryň içinde ýaşamaly bolýar. Hut şu kynçylyklar onuň eserlerindäki çuňňur pelsepäniň we ejiriň esasy çeşmesine öwrüldi.

1929-njy ýylda Frida özüniň kärdeşi Diego Riwera durmuşa çykdy we olaryň durmuşy rowaýata öwrülen wakalara baý boldy. Täze serial diňe bir sungat söýüjiler üçin däl, eýsem taryhy şahsyýetleriň ruhy dünýäsine gyzykyanlar üçin hem ajaýyp sowgat bolar. Netflix bu taslama arkaly meksika medeniýetiniň iň ýarkyn sahypalaryny global tomaşaçylar köpçüligine ýetirmegi meýilleşdirýär. Filmde surata düşjek esasy aktyorlaryň atlarynyň ýakyn wagtda yglan edilmegine garaşylýar.