Ýaponiýanyň Ýamaguti uniwersitetiniň hünärmenleri pişikleriň böküş we düşüş wagtynda deňagramlylygy saklamagynyň mehanizmini öwrendiler. Geçirilen barlaglar bu haýwanlaryň elmydama aýaklarynyň üstüne düşmeginiň syrynyň olaryň oňurgasynyň anatomiýasynda ýatandygyny görkezdi. Ylmy işiň netijeleri halkara derejeli «The Anatomical Record» žurnalynda çap edildi we biologlar tarapyndan ýokary baha berildi.

Ylmy barlaglaryň dowamynda pişikleriň oňurgasynyň döş böleginiň bil bölegine garanyňda has çeýedigi anyklandy. Ýokary tizlikli kameralaryň we ýörite markerleriň kömegi bilen haýwanlaryň howadaky hereketleri yzarlanyldy. Seljermeler pişigiň ýere düşmezden ozal bedenini tapgyrlaýyn aýlaýandygyny görkezdi: ilki bilen has çeýe bolan döş bölümi we öň aýaklar, soňra bolsa bedeniň yzky bölegi aýlanýar.

Bu hadysada oňurganyň bil bölegi durnuklaşdyryjy (stabilizator) wezipesini ýerine ýetirýär. Şeýle gurluş pişige howada çalt we takyk öwrülmäge mümkinçilik berýär. Şol bir wagtyň özünde, göwresiniň öň tarapynyň ýeňil bolmagy haýwanyň öz ugruny çalt üýtgetmegine we aýaklarynyň üstüne ygtybarly gonmagyna ýardam edýär.

Alymlaryň bu açyşy diňe bir biologiýa üçin däl, eýsem robototehnika we lukmançylyk üçin hem uly ähmiýete eýedir. Täze alnan maglumatlar haýwanlaryň oňurga şikeslerini bejermegiň döwrebap usullaryny işläp düzmäge we has çeýe hereket edýän robotlary döretmäge ýardam eder. Bu barlag janly tebigatyň inženerçilik çözgütleriniň tehnologiýalarda ulanylmagy üçin täze gapylary açýar.