Türkmenistanyň adyny dünýä dolduran «Galkynyş» at üstündäki oýunlar topary 21–24-nji maý aralygynda Stambulyň Atatürk adyndaky howa menziliniň çäginde guralýan VIII Etnosport festiwalynda ýurdumyza wekilçilik edýär. Döwletimiziň 25 adamdan ybarat bolan bu medeni wekiliýetine Türkmenistanyň at gazanan atşynasy Serdar Pygyýew ýolbaşçylyk edýär. Ägirt uly meýdançada guralan bu medeni çärede türkmen jigitleri özleriniň ilkinji şowly çykyşlaryny görkezdiler we olar 24-nji maýa çenli dowam eder.

Halkara medeni çäräni Bütindünýä etnosport konfederasiýasy ýokary derejede guraýar. Bu abraýly festiwal dünýä halklarynyň gadymy we milli sport görnüşlerini, asyrlar aşyp gelen medeni mirasyny we durmuş gymmatlyklaryny özünde jemleýär. Guramaçylar gatnaşyjylara we tomaşaçylara dürli halklaryň taryhy ýörelgelerini we iýmitleniş, sport, harby medeniýetini ýakyndan öwrenmäge giň mümkinçilikleri hödürleýärler.

Festiwalyň dabaraly açylyş dabarasy taryhy arhitektura esasynda gurlan «Han» çadyrynyň öňünde ýokary guramaçylyk derejesinde geçirildi. Çärede «Gülbank» orkestriniň ýerine ýetiren taryhy sazlary, şeýle-de Stambulyň taryhy türk saz toparynyň ýanyçarlar orkestri dabaranyň şowhunyny has-da artdyrdy. Açylyş dabarasynda Bütindünýä etnosport konfederasiýasynyň ýolbaşçysy Bilal Ärdogan çykyş edip, taslamanyň dünýä medeniýetiniň baýlygyny we dürlüligini dabaralandyrýandygyny, çagalar we maşgalalar üçin taryhy ruhy duýmaga şert döredýändigini belledi.

Häzirki wagtda bu halkara medeni we sport forumyna dünýäniň ýigrimiden gowrak ýurdundan, şol sanda Ýaponiýadan, Müsürden, Ispaniýadan, Russiýadan, Italiýadan, Meksikadan hem-de sebitiň beýleki döwletlerinden gelen wekiller gatnaşýarlar. Dünyäniň ünsüni çeken dördünji gün dowam etjek festiwalyň esasy maksatnamasyna milli göreş boýunça ýaryşlar we atçylyk sporty girizildi, bu ýerde türkmen ahalteke bedewleri özleriniň täsin kämilligini görkezýärler.