26-njy maýda ABŞ-a amala aşyrylan saparyň çäklerinde Türkmenistanyň daşary işler ministri Raşid Meredow bilen BMG-niň Baş sekretarynyň syýasy meseleler we parahatçylyk döredijilik boýunça orunbasary Rozmari DiKarlo duşuşdy. Türkmenistanyň DIM-iniň habar bermegine görä, duşuşykda hemişelik Bitaraplyk hukuk ýagdaýyna ygrarly bolan Türkmenistan bilen BMG-niň arasyndaky hyzmatdaşlygy täze sepgitlere çykarmagyň amaly gurallary we sebit howpsuzlygyny üpjün etmek meseleleri ara alnyp maslahatlaşyldy.

Gepleşikleriň dowamynda Aşgabatda ýerleşýän BMG-niň Merkezi Aziýa üçin öňüni alyş diplomatiýasy boýunça Sebit merkeziniň (UNRCCA) alyp barýan işlerine ýokary baha berildi. Taraplar sebitdäki durnuklylygy we döwletleriň arasyndaky özara ynamy has-da pugtalandyrmak maksady bilen, bu merkeziň wezipelerini we iş ugurlaryny giňeltmegiň mümkinçiliklerini ara alyp maslahatlaşdylar. Bu ädim Merkezi Aziýada parahatçylykly düzgünleşdiriş mehanizmleriniň netijeliligini artmaga ýardam eder.

Şeýle hem çärede Parahatçylyk we bitaraplyk uniwersitetini döretmek baradaky başlangyjy durmuşa geçirmegiň ilkinji amaly ädimleri aýan edildi. Şu maksat bilen, Türkmenistanyň DIM-niň Halkara gatnaşyklary institutynda Parahatçylyk we Bitaraplyk kafedrasynyň açylandygy, onuň binýadynda ýöriteleşdirilen magistr maksatnamasynyň amala aşyryljakdygy bellenildi. Duşuşygyň ahyrynda taraplar sebit taslamalarynyň, aýratyn hem Türkmenistan — Owganystan — Pakistan — Hindistan (TOPH) gaz geçirijisiniň parahatçylygy, durnukly ösüşi hem-de energetika howpsuzlygyny berkitmekdäki taryhy ornuny nygtadylar.