Baku şäherinde guralan ýokary derejeli türkmen-azerbaýjan gepleşikleriniň jemleri boýunça iki döwletiň arasyndaky hyzmatdaşlygy täze ugurlar boýunça pugtalandyrmaga gönükdirilen ikitaraplaýyn resminamalaryň uly toplumyna gol çekildi. Şol resminamalaryň hatarynda iki ýurduň gümrük edaralarynyň arasyndaky amaly gatnaşyklary çuňlaşdyrmaga şert döredýän ylalaşyklar aýratyn orun eýeledi.

Gümrük ulgamynda gazanylan ylalaşyklara laýyklykda, taraplar sebit boýunça daşalýan harytlar baradaky deslapky maglumatlary yzygiderli we netijeli alyşmagyň ýörite tehniki şertlerini tassykladylar. Bu täze mehanizm serhet zolaklarynda gümrük amallaryny düýpli çaltlandyrmaga, ýükleriň resmileşdirilýän wagtyny gysgaltmaga hem-de sebitara söwda amallarynyň has-da aç-açan bolmagyna goni ýardam eder.

Mundan başga-da, taraplar özara söwdanyň gümrük statistikasy ulgamynda hyzmatdaşlyk etmek baradaky Teswirnama gol çekdiler. Bu resminama iki goňşy döwletiň arasyndaky haryt dolanyşygynyň has takyk we döwrebap hasaba alnyp barylmagyny üpjün etmäge, şeýle hem geljekde daşary ykdysady işjeňlik boýunça möhüm seljeriş çözgütlerini kabul etmek üçin ygtybarly binýat döretmäge mümkinçilik berer.