Saud Arabystanynyň «Al-Nasr» klubunyň we Portugaliýanyň milli ýygyndysynyň hüjümçisi Kriştianu Ronaldu häzirki zaman türgenleriniň arasynda umumy gazanjy 2 milliard dollarlyk sepgide ýeten ilkinji türgen hökmünde taryha girdi. «Forbes» žurnalynyň geçiren hünärmenlik seljermelerine görä, 41 ýaşly futbolçy 2026/27 möwsüminde şertnama laýyklykda 250 million dollar zähmet hakyny alar. Mundan başga-da, Ronalduyň hususy biznes taslamalary we iri mahabat ylalaşyklary oňa ýene-de 50 million dollar töweregi goşmaça girdeji getirer.

Neşiriň çaklamalaryna görä, geljek ýyl bu ägirt uly 2 milliard dollarlyk sepgide «Inter Maýami» klubynyň argentinaly hüjümçisi Lionel Messi hem ýetip biler. «Forbes-iň» çaklamalaryna görä, Messiniň geljekki umumy girdejisi 145 million ýewro deň bolar. Şeýle hem Ronaldunyň täze maýa goýum taslamalary işjeňleşýär. Oktýabr aýynda onuň Bragansa munisipalitetinde mineral suw önümçiligine 10 million ýewro maýa goýandygy mälim boldy. Bu täze zawodyň gurluşygyny 2027-nji ýylyň ahyryna çenli tamamlamak meýilleşdirilýär.

Finans hünärmenleriniň bellemegine görä, «umumy gazanç» görkezijisi salgytlar tutulmazdan öňki ähli girdejileri, ýagny klub zähmet haklaryny, bonuslary, sponsorlyk we ygtyýarnama ylalaşyklaryny ham-da maýa goýum girdejilerini öz içine alýar. «Forbes» bu maglumatlary açyk şertnamalara, hyzmatdaş kompaniýalaryň maliýe hasabatlaryna daýanyp taýýarlaýar. Ronaldunyň bu maliýe üstünligi häzirki zaman sport biznesinde täze rekord hökmünde bellendi.