Türkmenistanyň Halk Maslahatynyň Başlygy Gurbanguly Berdimuhamedow Hytaýyň «CGTN» teleýaýlymyna beren interwýusynda häzirki zaman dünýäsiniň iň ýiti meseleleriniň birine — parahatçylygyň we durnuklylygyň ähmiýetine degip geçdi. Milli Liderimiz dünýädäki halkara ýagdaýlaryň çylşyrymlydygyna garamazdan, ähli meseleleri Birleşen Milletler Guramasynyň hukuk gurallaryna daýanyp, gepleşikler arkaly çözmegiň mümkindigini belledi. Bu çemeleşme Türkmenistanyň Bitaraplyk ýörelgelerine esaslanýan parahatçylyk söýüji daşary syýasatynyň özeni bolup durýar.

Gahryman Arkadagymyz söhbetdeşligiň dowamynda Türkmenistanyň gapma-garşylyklara goşulmazlyk we güýç ulanmazlyk syýasatynyň diňe bir syýasy däl, eýsem uly ahlak meselesidigini nygtady. Onuň aýtmagyna görä, uruşlar ilkinji nobatda ynsan ykballaryna, adamlaryň arzuw-hyýallaryna we gelejege bolan umytlaryna öwezi dolup bolmajak zarba urýar. Şol sebäpli hem häzirki döwürde dünýä bileleşigi uruş etmek üçin däl-de, eýsem şol uruşlaryň öňüni almak we aradan aýyrmak üçin on esse köp tagalla etmelidir.

Milli Liderimiz öz garaýyşlaryny orta asyrlaryň meşhur türkmen döwlet işgäri Baýram han Türkmeniň: «Parahat ýaşamagy başarmak bilen deňeşdirilende, uruşda ýeňiş gazanmak hiç zatdyr» diýen pähimli sözleri bilen delillendirdi. Bu taryhy pähim häzirki zaman dünýä syýasatynda hem öz ähmiýetini ýitirmän, parahatçylygyň we özara düşünişmegiň islendik harby ýeňişden has belentdedigini görkezýär. Türkmenistan we Hytaý bu ugurda dünýäde ynanyşmagy hem-de özara hormat goýmagy dikeltmek ugrunda bilelikde çykyş edýärler.

Söhbetdeşligiň iň täsirli pursatlarynyň birinde Halk Maslahatynyň Başlygy urşuň pidalary barada ýönekeý raýat hökmünde öz garaýşyny beýan etdi. «Atylan ok hiç haçan yzyna gaýtmaýar. Ol harbymy, esgermi, ýönekeý raýatmy ýa-da çagamy — saýgarmaýar» diýip, Milli Liderimiz urşuň diňe pida we hasrat getirýändigini ýatlatdy. Taryhyň dowamynda hiç bir urşuň hakyky ýeňiş getirmändigini bellemek bilen, Gurbanguly Berdimuhamedow tutuş adamzadyň abadan we bagtyýar durmuşy üçin parahatçylygyň iň mukaddes gymmatlykdygyny ýene-de bir gezek tassyklady.