Türkmenistanyň Ministrler Kabinetiniň Başlygynyň orunbasary Batyr Annaýew Azerbaýjan Respublikasynyň ýurdumyzdaky Adatdan daşary we Doly ygtyýarly ilçisi Gismat Gozalow bilen duşuşyk geçirdi. Gepleşikleriň dowamynda taraplar iki döwletiň arasyndaky syýasy gatnaşyklaryň ýokary derejesini we döwlet Baştutanlarynyň syýasy erkiniň netijesinde hyzmatdaşlygyň strategik häsiýete eýe bolandygyny kanagatlanma bilen bellediler.

Duşuşygyň esasy üns merkezi ulag, logistika we tranzit amallarynyň häzirki ýagdaýyna hem-de olaryň geljekki mümkinçiliklerine gönükdirildi. Iki ýurduň bähbitli geografik ýerleşişiniň sebitara ulag geçelgelerini ösdürmekde we täze logistik ugurlary kemala getirmekde möhüm orun eýeleýändigi bellenilip geçildi. Bu ugurda alnyp barylýan işler diňe bir iki ýurduň däl, eýsem tutuş sebitiň ykdysady bäsdeşlige ukyplylygyny artdyrmaga hyzmat edýär.

Şeýle hem taraplar telekommunikasiýa we sanly ösüş ulgamyndaky hyzmatdaşlygyň täze ugurlaryny ara alyp maslahatlaşdylar. Sanly infrastruktura döwrebaplaşdyrmak we döwrebap maglumat tehnologiýalaryny ornaşdyrmak boýunça Hökümetara toparyň çäklerinde anyk ädimleri ädemk barada ylalaşyldy. Bu başlangyçlar serhetüsti aragatnaşygy durnukly saklamaga we sanly ykdysadyýetiň mümkinçiliklerini giňeltmäge gönükdirilendir.

Gepleşikleriň jeminde Azerbaýjan bilen Türkmenistanyň arasyndaky doganlyk gatnaşyklary amaly hyzmatdaşlyk bilen has-da baýlaşdyrmaga bolan özara gyzyklanma tassyklanyldy. Strategik hyzmatdaşlyk platformasynyň çäklerinde amala aşyrylýan taslamalar geljekde iki ýurduň durnukly ösüşine we üstaşyr geçiriş kuwwatynyň doly nümayiş etdirilmegine şert döreder.