Şu gün türkmen halkynyň Milli Lideriniň gatnaşmagynda hemişelik Bitaraplygyň 30 ýyllygyna bagyşlanan dabaraly sylag gowşurylyş çäresi geçirildi. Dabaranyň dowamynda daşary ýurtlaryň raýatlaryna hem-de Türkmenistanyň hormatly ýaşulylaryna «Türkmenistanyň Bitaraplygynyň 30 ýyllygyna» atly ýubileý medaly we ýadygärlik kümüş nyşany dabaraly ýagdaýda gowşuryldy. Bu barada «Watan» habarlar gepleşiginde habar berildi.

Resmi kararlara laýyklykda, sylaga mynasyp bolanlaryň hatarynda Koreýa Respublikasynyň Bütindünýä innowasiýalary öwreniş institutynyň ýolbaşçysy Kim Jin Pýon, BMG-niň Baş sekretarynyň Merkezi Aziýa boýunça Ýörite wekili we BMG-niň sebitleýin öňüni alyş diplomatiýasy merkeziniň başlygy Kaha Imnadze, «Çalik Holding» kompaniýalar toparynyň dolandyryjylar geňeşiniň başlygy Ahmet Çalik, şeýle hem Germaniýa Federatiw Respublikasynyň Lýudwig Maksimilian uniwersitetiniň klinikalar toplumyna degişli Fýurstenfeldbruk ylmy-gözleg klinikasynyň umumy we wisseral hirurgiýa bölüminiň baş lukmany doktor Fritz Wilhelm Wolfgang Şpelsberg bar. Sylaga eýe bolanlar bu hormaty uly buýsanç bilen kabul edip, Gahryman Arkadaga tüýs ýürekden minnetdarlyk bildirdiler.

Şeýle-de şol gün Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň Ýaşulylar geňeşiniň agzalaryna hem degişli ýubileý medallary we ýadygärlik nyşanlary gowşuryldy.

Dabaranyň dowamynda kabul edilen degişli resminamalaryň doly mazmunynyň metbugatda çap ediljekdigi hem habar berildi.