Paýtagtymyzda Aşgabat şäheriniň gününe bagyşlanyp geçirilýän «Ak şäherim Aşgabat – 2026» atly XXV halkara sergisiniň we maslahatynyň ikinji gününiň çäreleri işjeň pikir alyşmalar häsiýetinde dowam edýär. Ýurduň degişli pudak edaralarynyň ýolbaşçylarynyň hem-de dünýäniň iri kompaniýalarynyň wekilleriniň gatnaşmagynda guralan bu forum gurluşyk, senagat, energetika we urbanistika ulgamlarynda strategik taýdan möhüm bolan sanly we innowasion başlangyçlary öňe sürmek üçin netijeli meýdança öwrüldi.

Maslahatyň iş meýilnamasy üç sany esasy sessiýany öz içine alýar. «Akylly» şäher gurluşygy we kämil binagärlik taslamalary baradaky ilkinji bölümi gurluşyk we binagärlik ministri A.Geldiýew açyp, ýurduň tejribesi barada aýtdy. Awtomobil ýollary ministri H.Kerimow bolsa paýtagtyň we sebitleriň esasy ýol-ulag düzümini ösdürmegiň meýilnamalaryny mälim etdi. Bu sessiýada dünýä belli «Zaha Hadid Architects», «Inros Lackner SE», «Todini Costruzioni Generali», «MARINI Makina», «Changsha Zoomlion» we «Intermontaž» ýaly kompaniýalaryň wekilleri özara tejribe paýlaşdylar.

Forumyň ikinji böleginde gurluşyk pudagyndaky üpjünçilik zynjyryny kämilleşdirmek baradaky meselelere seredildi. Türkmenistanyň senagat we gurluşyk önümçiligi ministri T.Nurow hem-de «Türkmenhimiýa» döwlet konserniniň başlygy R.Myradow halkara hyzmatdaşlygy çuňlaşdyrmak ugrunda «Mitsubishi Corporation», «Kawasaki Heavy Industries», «Daewoo Engineering», «PETRONAS Carigali», «Toyo Engineering» we «Air Liquide Global» ýaly iri daşary ýurt kompaniýalarynyň ýolbaşçylary bilen bilelikde çykyş etdiler.

Jemleýji sessiýanyň dowamynda esasy üns «akylly» şäherler üçin energiýa netijeliligini ýokarlandyrmaga we sanly ulgamlary ornaşdyrmaga gönükdirildi. Pudak boýunça esasy hasabat bilen energetika ministri A.Saparow çykyş etdi. Durnukly energetika ulgamlaryna geçiş prosesini ministr hem-de IRENA-nyň baş direktory Françesko La Kamera «Siemens Energy», Aziýa ösüş banky, «Baker Hughes», «Bitdeer Technologies» we «SODIPP International» kompaniýalarynyň öňdebaryjy bilermenleri bilen giňişleýin ara alyp maslahatlaşdylar.