Deňze çykalgasy bolmadyk ösüp barýan döwletler boýunça BMG-niň Üçünji Konferensiýasynyň çäginde Türkmenistanyň hususy sektory dünýä bazaryna çykmak üçin täze mümkinçilikler alar

Deňze çykalgasy bolmadyk ösüp barýan döwletler boýunça BMG-niň Üçünji Konferensiýasynyň çäginde geçiriljek Hususy sektor forumy Türkmenistanyň kiçi we orta telekeçiliginiň ornuny pugtalandyrmaga hem-de olaryň dünýä üpjünçilik zynjyrlaryna goşulmagyna gönükdirilen özboluşly meýdança bolar.

TDH-nyň habar bermegine görä, Forumyň guramaçylary Türkmenistanyň geografik ýerleşişi bilen bagly kynçylyklaryň ýeňip geçilmeginde onuň orundaky ähmiýetine aýratyn üns berýärler.

Konferensiýanyň çäklerinde telekeçilik, maýa goýumlaryny çekmek, logistika we ulag geçelgelerini ösdürmek, söwda gatnaşyklaryny giňeltmek bilen bagly ýörite sessiýalar we çäreler geçiriler.

Türkmenistanyň telekeçileri öz taslamalaryny tanyşdyrmak, beýleki ýurtlaryň wekilleri bilen tejribe alyşmak hem-de täze iş gatnaşyklaryny ýola goýmak mümkinçiligine eýe bolarlar. Bu bolsa özara bähbitli şertnamalaryň baglaşylmagy we bilelikdäki başlangyçlaryň durmuşa geçirilmegi üçin amatly mümkinçilikleri döreder.

Türkmenistanyň telekeçiligi diňe adaty ugurlar bilen çäklenmeýär. Häzirki wagtda kompaniýalaryň köpüsi durnukly ösüşe goşant goşýan innowasion taslamalara maýa goýýarlar — şol sanda energiýa tygşytlaýjy tehnologiýalaryň ornaşdyrylmagy, gaýtadan dikeldilýän energiýa çeşmeleriniň ösdürilmegi, ekologiýa taýdan arassa önümleriň öndürilmegi we resurslary tygşytlaýjy usullaryň ulanylmagy ýaly ugurlarda.

Mysal üçin, oba hojalygynda daýhanlar öňdebaryjy agrotehnologiýalary, damjalaýyn suwaryş ulgamlaryny we organiki ekerançylyk usullaryny işjeň ulanýarlar. Bu bolsa hasyllylygyň ýokarlanmagyna hem-de suw serişdeleriniň rejeli peýdalanylmagyna ýardam berýär. Senagat pudagynda bolsa daşky gurşawy goramak boýunça dolandyryş ülňülerini ornaşdyrýan we zyňyndylaryň möçberini azaldýan kärhanalaryň sany barha artýar.

Awaza Milli Syýahatçylyk Zolagynda geçiriljek bu Konferensiýa, Türkmenistanyň hususy sektory bilen halkara guramalarynyň, şol sanda BMG-niň dürli agentlikleriniň, maliýe institutlarynyň we donor guramalarynyň arasynda hyzmatdaşlygyň çuňlaşdyrylmagy üçin täze mümkinçilikleri açar.

Şeýlelikde, Hususy sektor forumy ýurdumyzda telekeçiligi ösdürmekde möhüm ädim bolup, Türkmenistanyň halkara arenasyndaky ornuny has-da pugtalandyrar. Bu waka diňe bir daşary ýurtly hyzmatdaşlaryň türkmen işewürligine, onuň mümkinçiliklerine bolan gyzyklanmasyny artdyrmak bilen çäklenmän, eýsem bazar mehanizmleriniň has-da ösdürilmegine we daşary ýurt maýa goýumlarynyň çekilmegine güýçli itergi berer.