2026-njy ýylyň 1-nji maýynda Türkmenistanyň Türkiýe Respublikasyndaky Ilçisi Mekan Işangulyýew Türkiýäniň Palatalar we biržalar birleşiginiň başlygy Rifat Hisarjyklyoglu bilen duşuşyk geçirdi. Duşuşygyň barşynda taraplar söwda-ykdysady ulgamda ikitaraplaýyn hyzmatdaşlygyň häzirki ýagdaýyna we ony mundan beýläk-de ösdürmegiň geljegine ýokary baha berdiler. Esasy üns häzirki zaman ykdysady şertlerini nazara almak bilen işewürlik gatnaşyklaryny diwersifikasiýa etmäge gönükdirildi.

Taraplar özara söwda dolanyşygyny yzygiderli artdyrmak we iki ýurduň telekeçilik düzümleriniň arasyndaky gatnaşyklary çuňlaşdyrmak üçin uly mümkinçilikleriň bardygyny nygtadylar. Şeýle hem, dürli ugurlar boýunça täze bilelikdäki taslamalary durmuşa geçirmegiň ykdysady gatnaşyklary täze derejä çykarjakdygy bellenildi. Işewürlik gatnaşyklaryny işjeňleşdirmekde ikitaraplaýyn hyzmatdaşlygyň täze gurallaryny ulanmak boýunça pikir alyşmalar boldy.

Duşuşygyň ahyrynda ykdysady hyzmatdaşlyk boýunça Hökümetara toparynyň we Türkmen-türk işewürler geňeşiniň alyp barýan işleriniň ähmiýeti bellenilip geçildi. Mundan başga-da, pudaklaýyn sergileriň we bilelikdäki işewürlik forumlarynyň geçirilmeginiň iki ýurduň işewürler jemgyýetçiliginiň ýakynlaşmagyna we täze ykdysady hyzmatdaşlyklaryň ýola goýulmagyna ýardam etjekdigine ynam bildirildi.